Muabot sa 1,946 ka mga kahoy ang natanom sa mga kawani sa NIA Region 7 sa gipahigayong NIA Nationwide simultaneous Tree Planting Activity adlawng Byernes, Hunyo 30, nga may temang “Tao, Agrikultura at Kalikasan Para sa Progresibong Kaunlaran”.
Kini parte sa kasaulugan sa ika-60 nga anibersaryo sa National Irrigation Administration (NIA) niadtong ika-22 sa Hunyo tuig 2023 nga sibo sa National Greening Program sa NIA (E.O. no.23 s.2011, E.O. no.193 s.2016) ug sa Watershed Rehabilitation and Protection Program sa NIA Region 7 nga gisugdan niaging tuig.
Tumong sa maong programa nga mapadaghan ang kahoy sa mga sabakan sa tubig o watersheds aron panalipod sa pagkankan sa yuta padung sa dam nga maoy hinungdan sa posibleng pagmenus sa tubig nga masawd niini.
Matod sa Bohol Integrated Irrigation System (BIIS) Head nga si Engr. Evelina P. Putong, dakong tabang ang maong tinuig nga aktibidad sa pagkab-ot sa malungtaron ug episyente nga serbisyong patubig para sa mga mag-uuma.
"Dako namo nga pasalamat nga nagpadayon ang atong tree planting o tree growing activity aron di mudawhog ug mapugngan ang mga yuta nga mudung sa atong reservoir kay mapuno sya ug lapok tungod sa pagpamutol og kahoy."
536 ang natanom sa NIA R7 Regional Office sa Brgy. Zamora ug Brgy. Sikatuna sa lungsod sa Talibon diin nahimutang ang Talibon Irrigation System kon Zamora Dam. Samtang 509 ka kahoy ang natanom sa Brgy. Anibongan, Sierra Bullones, Bohol nga tinubdan usab sa Malinao Irrigation System sa Lungsod sa Pilar.
Samtang 900 ka mga seedlings gikan sa Department of Environment and Natural Resources (DENR) ang mga natanom sa NIA R7 field offices: 300 ang natanom sa Bohol-Cebu-Siquijor Irrigation Management Office sa Ilihan Sur, Tubigon, Bohol para sa Ilihan Dam; 300 usab ang natanom sa Cebu Office sa Carcar City nga watershed usab sa Can-asujan Dam; ug 300 ka coffee seedlings sa Dauin, Negros Oriental para sa Dauin Small Reservoir Irrigation System.
Ang mga seedlings nga gitanom sa NIA RO nagkalain-laing klase: dunay hardwood ug fruit-bearing trees sama sa cacao, kape, rambutan, lanzones, ug lemon nga gikan mismo sa NIA Nursery-- resulta sa Watershed Rehabilitation and Protection Program nga gipangunahan sa NIA Region 7. Ang mga lubi gikan sa Philippine Coconut Authority (PCA).
Dakong tabang usab ang mga Irrigators' Association (IA), local officials ug ang mga line agencies sama sa BFP ug PNP sa matag lugar sa pagpahigayon sa tanom kauban ang mga Managers, Section Chiefs ug mga employees sa nagkadaiyang opisina sa NIA Region 7.
Giklaro ni Engr. Putong nga kining gipahigayon dili lang tree planting kundi tree growing tungod kay kining mga kahoy nga gitanom gialimahan hantod nga kini mabuhi ug mamunga aron mapahimuslan sa mga tag-iyahan sa lunang gitamnan.