NIA mangita’g P10 B patubig sa Cantakoy

Tuesday, July 04, 2017 - 15:59

TAGBILARAN CITY, June 27, (PIA)—Gipasalig na ni National Irrigation Administration (NIA) Administrator Ricardo Visaya nga pangitaan nila og pundo alang sa katumanan sa P10 bilyones nga Bohol Northeast Basin (BNB).

Didto sa iyang labing unang gitambongan nga pag-lihi sa Benliw Small Reservoir Irrigation Project (SRIP) human sa tulo ka buwan nga paglingkod isip administrador sa NIA, gipadayag niya nga may 19,400 na lang ka ektarya nga luna sa Bohol ang mahimong kapatubigan.

Gikan sa 44,000 ka ektarya, napatubigan na ang dakong bahin niini dala sa mga higante nga proyektong patubig sa mga kabasakan nga una na nga natukod.

Lakip sa mga natukod nga patubigan mao ang Pilar Pamacsalan Dam, Bayongan San Miguel Dam, Capayas Dam sa Ubay, Talibon SRIP ug uban pang gagmay nga mga pagsira sa sapa aron makapatubig.

Sa kasamtangan nga 19,400 ka ektarya nga kabasakan nga kinahanglan pang abtun sa patubig, usa ka daku nga plano sa irigasyon ang nakita ug gisugyot na ni Kongresista Aristotle Aumentado.

Ang BNB, mogamit sa suba sa Cantakoy aron lup-an og ikapasanap ang tubig sa gibanabana na nga 19,000 ektaryas nga kahumayan sa Danao, Dagohoy ug mga silingan nga lugar.

Hinuon, sa nahimo na nga feasibility studies kabahin niini, kon moabut sa 19,000 ang abton sa patubig, dako usab ang lugar nga masanapan.

Gani, segun sa Kongresista, may dako usab nga gamit kining gisugyot nga patubig dala na sa mahimong kini ang tinubdan sa gahum dagitab.

Gibutyag sa mga eksperto gikan sa Energy Development Corporation, ang dam sa patubig nga mahimo sa Bohol Northeastern Basin mahimong makahatag og gikan sa 6 megawatts ngadto sa 12 mega watts sa koryente.

Dugang pa, kini mamahimong dakong tinubdan sa tubig nga magamit sa balay, dugang pa ni Aumentado.

Dala niini, mismo si Administrador Visaya ang mibutyag sa unsa ka importante nga kapundohan ang P10 bilyones nga patubig.

Gawas pa, matud niya, kon mapabarug na kini, may 400 ektaryas na lamang nga kabasakan ang angay nga abton pa sa NIA.

Didto usab sa nahisgutang groundbreaking, si Cabinet Secretary Leoncio Evasco mipalubad sa dakong tumong nga himoon ang Bohol nga rice basket sa Central Visayas.

Gupadayag sa Bol-anong naglingkod sa taas nga posisyon abag sa Presidente nga kon mahimo, idoble pa ang rice sufficiency sa Bohol sa panglantaw nga himoon ang panguma sa humay nga makaaghat sa mga tigpananum sa maayong ugma sa panghumayan. (rahc/PIA-7/Bohol)

By : Rey Anthony H. Chiu - Manager, PIA-Bohol Infocen.